هاي ياجميلات
صباح / مساء النور 💜
بوست اليوم حيكون عن الخطوات الي سويها عشان احضر بشرتي للمكياج
بما انو العيد باقي عليه اسبوع تقريبا و المناسبات كثيره حتكون والبشره تحتاج عنايه عشان المكياج يسير حلو و مرتب على البشره حبيت انزلكم الخطوات السهله دي
شي اساسي نسويلنا روتين او خطوات عنايه قبل المكياج عشان ماتكون البشره باهته او فيها جلد ميت او متقشره
لو كانت البشره فيها الاشياء الي قلتها مستحيل يزبط الاساس حتى لو حطيتي فل كفر عشان كذا العنايه شي مهم واساسي .
اول خطوه اسويها اغسل وجهي بالغسول واستخدم معاه جهاز تنظيف البشره لونا
ليه ابدأ بالغسول ؟ عشان انظف البشره و المسام وتقدر بشرتي تستفيد من باقي المنتجات الي احطها عليها من ماسكات و تونر ووو الخ
ثاني خطوه استخدم مقشر خفيف للبشره عشان يزيل الجلد الميت ويعطيني ملمس ناعم للوجه
ثالث خطوه استخدم ماسك ومقشر الفراوله تقريباً اخليه من 15 الى 20 دقيقه
يعطيني نضاره و ومنظر صحي للبشره احب احطه حتى على الشفايف يسوي تقشير لها بشكل لطيف
رابع خطوه استخدم الشيت ماسك " الماسكات الورقيه " عشان تعطيني ترطيب ونعومه للبشره
واحب استخدم ماسكات العين كمان تعطي شويا ترطيب لمنطقة تحت العين تقريباً اخليهم من 15 الى 20 دقيقه
خامس خطوه التونر انا حالياً استخدم بخاخ جل الصبار وجداً حابته
يعطيني نعومه وترطيب ويهدي بشرتي اذا كانت متهيجه وريحته تجنن وبارد على البشره عشان يقفل المسامات
سادس خطوه ترطيب البشره
اخر خطوه ترطيب الشفايف
وبس بكذا خلصت خطواتي لتحضير بشرتي للمكياج
امكن تشوفوها كثيره بس لما تسوها ماتاخذ من وقتكم الا امكن ساعه او اقل
حلو لو تسوها ليلة العيد والصباح تكون بشرتكم مترطبه وناعمه وصحيه .
و كل عام وانتم بخير ❤️
دمتم بحب 💜
