السلام عليكم ورحمة الله وبركاته
صباح/ مساء السعاده
بوست اليوم حتكلم فيه عن ترند الملابس لـ 2017 وبذات الاشياء الي حسيتها تنفع للعيد و الصيف
اذا كنتي لسا ما اشتريتي للعيد اقري الموضوع و ان شاءالله تستفيدي لو بشي بسيط
و يلا نبدأ
.
الالوان الي دارجه الفتره دي " الابيض و الاصفر بدرجاته و الزيتي بدرجاته و الوردي بدرجاته و الازرق بدرجاته "
و اكيد هذا مايمنع انو تلبسي الوان ثانيه البسي الي تحبي
ودحين نشوف الموديلات و القصات الي دارجه
.
الجينزات الي دارجه الفتره دي تكون فيها
اللؤلؤ او الي نازل منها خيوط زي اخر صوره يسار او يكون فيها طبعة زي اخر صورة يمين
او الستايل العادي الي متعودين عليه المشقق العادي
اكتر شي حبيتو اللؤلؤ حسيتو انيق مره
ولقيت طريقه تسويه فالبيت ادا مالقيتي في السوق
تشتري جينز ساده وتسوي و انتبهي انو اللؤلؤ مفتوحه من الجهتين عشان تدخلي الخيط
وتقدري تسوي مثلاً اكتر من حجم كبير وصغير و سط او تختاري لونين زي الصوره
تقدري تبدعي فيه ❤️
.
الي مستمره معانا من العام الرفلز " الكشكشه"
بجميع قصاتها واشكالها ممكن تلاقي منها فساتين و بلايز
وحتى بناطيل حوريكم هوا في الصوره الثاني
.
كمان الشيفون دارج المطرز او الساده
و القصات الي دارجه مرره حلوه تحتاري ايش تاخذي
من اليمين ثاني صوره لو نلاحظ دمجت بين ترندين البلوزه الشيفون المطرزه + بنطلون الرفلز " الكشكشه" وادتها لوك مره انيق وناعم
واخر صوره يمين دمجت بين الشيفون+ الرفلز فنفس الوقت
و اكتر من صوره كمان فيها رفلز
.
احزمة الكورسيه
عن نفسي ما حبيتها كثير بس اكتر ستايل تقبلتو منها اخر صوره يمين الاصفر و الي جنبها الاسود
ونلاحظ كمان في اخر صوره يسار دمجت بين ترندين الشيفون + الكوروسيه
.
المورد دارج بشكل انيق الورود تكون كبيره وشويا في مسافات بينهم
اخر صوره يسار كمان دمجت ترندين الشيفون + المورد
.
قماش المخطط و الكروهات او المربعات
كمان دارج ولاحظو انهم برضو دمجو معاه الرفلز " الكشكشه "
.
قماش الميتاليك " الامع "
كمان دارج بذات التنوره منها زي الصوره فوق يمين وتحت يمين
.
الشوزات كمان ميتاليك
كمان في الصوره اليسار دمجت بين ترندين جينز اللؤلؤ و شوز ميتاليك فتنسيق واحد
.
كيلون الشبكة
دارج تحت الجينزات اكثر شي
اول صوره يسار حبيت حركه الكرستال مع الكيلون ادتو نعومه
.
بنسبه للشعر البنس دارجه و الظفيره الناعمه
وكمان اللؤلؤ دارج فحبيت حركتو فالشعر للي ماتحب البنس زي اخر صوره في الوسط
البنس تلاقوها في اتش اند ام .
وبس كدا خلص بوست اليوم ان شاءالله استفدتو لو بشي بسيط ❤️
انا مغطيت كل ترند للسنه دي الموضوع واسع وكبير وعشان ما تملو اختصرتو لكم
و في الاخير " البسي من الموضه الي يريحك ويناسب شخصيتك واتركي الي ما يناسبك "
دمتم بحب ❤️
