،
،
السلام عليكم ورحمة الله وبركاته
بوست اليوم عن منتجات خلصتها وجربتها وحنشوف مع بعض ادا حرجع اشتريها ولا لا
بعض المنتجات باقي فيها ما خلصتها مره حتكون ماعجبتني
البوست طويل جهزيلك سناك جنبك 😇
يلا نبدأ 💜
لوشن من باث اند بادي من مكوناته الافندر " الخزامى" و البابونج ، يوعدنا انو يساعد على النوم بهدوء.
تقيمي : مره حبيتو وحبيت الترطيب الي يديني هوا وريحتو تجنن بس مايساعد على النوم اديه 9/10 وحرجع اشتريه
سعرو :٤٩ ريال
كريم مرطب من جونسون مع خلاصة البابايا
تقيمي: حبيتو وحبيت ريحتو اكثر شي ترطيبو جيد اديه 7/10
ممكن اني ارجع اشتريه ثاني
سعرو : ١٠ ريال اتوقع
زيت فيتامينe مرطب و مغذي للشعر و الوجه
تقيمي: كلنا نعرف فوائد فيتامين e للبشره والشعر الزيت جدا رهيب ترطيبو عالي بشكل ملحوظ
يفضل نخلطو مع كريم او زيت ثاني لأنو قوي شويا، و بنسبه ليا دي تاني علبه استخدمها اديه 10/10
حرجع اشتريه تاني اكيد
سعرو :٣٧ ريال من اي هيرب
عطور الجسم من باث اند بادي
تقيمي : مره احبها و مي اول مره ولا ثاني وثالث مره اشتريها احبها بعد الشور او قبل النوم روائحها هاديه وحلوه
طيب بقلكم على نقطه العطور دي سعرها ٨٠ ريال احس كثير عليها سعرها لأنو ما تجلس فتره طويله طيب متى نشتريها؟ وقت التخفيضات اكيد ينزل سعرها ويسر معقول تسير ٢٠ ، ١٥ ، ٢٥ ، ٣٠ ريال فرصه تشتري بسعر واحد اثنين
اديها 10/10 حرجع اشتريه
كريم من ايف روشيه ٢ في ١ كريم تجميل اليدين و الاظافر بزهرة العطاس العضوية
تقيمي : الكريم دا فضييييييييييع حقيقي وبدون اي مبالغه ماكان عندي اظافير بالزبط زي اظافر الاطفال الصغار ومن بعد ما استخدمتو لمدة شهر طولت الحمدلله واستمريت عليه فتره ولما الاحظ انو اظافيري مي قويه كمان استخدمو دي العلبه رقم خمسين اتوقع عندي 😂😂 اديه 100/100
حرجع اشتريه تاني اكيد
سعرو : ٣٥ ريال من ايف روشيه
جل الصبار الكوري
تقيمي : احب احطو بعد الماسكات لأنو بارد ف يدي انتعاش للوجه غير انو فوائد الصبار كثيره كمانه
ودي تاني علبه اشتريها اديه 10/10
حرجع اشتريه
سعرو ٣٠ ريال من اي هيرب
فازلين الشفايف الصغير
تقيمي : حسيتو عادي اخذ اكبر من حجو صراحه يعني الكبير زيو م انصح فيه
اديه 2/10 بس عشان شكلو كيوت
سعرو اتوقع ٣٠ او اقل او اكتر مني فاكره بالزبط كم
زيت شجرة الشاي من بودي شوب
تقيمي : مره جميل للحبوب الي تطلع فالوجه اخد منو بعود الاذاني واحط على الحبه يعقمها وتبدا تصغر وغير عن كدا مايبقى اثر لها ، ونقدر نستخدمو مع الماسكات اديه 10/10
سعرو ٣٠ ريال
زيت من شركة بالمرز يوعدنا ب يخفي الندوب + يخفي علامات التمدد + يجدد البشره التالفه ويرطب البشره الجافه + يوحد لون البشره + يبعد الشيخوخه
تقيمي : افشل زيت فالحياه كلها حتى ترطيبو عادي في اشياء من الي يوعدنا فيها موجوده فيا وبعضها لا ، ماسوا ولا حاجه اديتو فرص كثيير خلصت ربع العلبه وماشوفت نتايج اديه 0/10
مستحيل ارجع اشتريه
زبدة الشيا الافريقيه
تقيمي : احبها بس فيها مشكله ريحتها شويا مزعجه بس نتايجها خرافيه بالذات للاسترتش مارك الحمرا " علامات التمدد" استمريت عليها لما طلعتلي وبدت تختفي الحمدلله حكتب بوست كامل عنها قريباً
اديها 10/10 واكيد حشتريها تاني
سعرها : ١٠٠ ريال حجمها كبير الي عندي
تونتر من نيفيا
تقيمي : حسيتو عادي مقارنه ب الي لون علبتو بنك داك اجمل فالتنظيف
دا عادي مره اديه 5/10
ماحرجع اشتريه حجرب غيرو
سعرو ١٥ ريال
،
،
وبكدا خلصنا الجزء الاول بعد فتره حنزل الجزء التاني ان شاء الله
دمتم بحب 💜
