.
السلام عليكم ورحمة الله وبركاته
صباح/مساء النور ياحلوين
بوست اليوم حتكلم في عن مفضلاتي لشهر فبراير
اشياء جربتها كثير وحبيتها
ويلا نبدأ
.
.
الميك اب الي حبيتو فالفتره الاخيره 💜
.
.
بليت ذا بالم MEET MATT
الوانه جميله وهاديه واساسيه وحجمُه مناسب للشنطه
.
مسكارة بنفت Roller Lash
كثيييير اتكلمو عنها وغنيه عن التعريف مررره تعكف الرموش وتدي شكل طبيعي احبها لكل يوم او حتى مناسبات خفيفه هههه المهم جميله💜
.
.
لب ستيك من سيفورا
كتبت تدوينه عنو قبل كذا تلاقوها هنا
ارجع و اقول من اجمل اللب ستيك الي جربتها في حياتي
ريحتو فل مرررره يجنن💜
و دا رقمو
.
.
مسكارة الحواجب من بنفت Gimme Brow
برايمر الحواجب من بنفت BROWVO
برضو اتكلمت عنهم في تدوينه هنا
تدي لوك طبيعي وجميل ومستحيل استغني عنهم المنتجين يكملو بعض
.
.
زيت اللوز الحلو و زبدة الشيا اصدقائي في هذا الشتاء
مع البرد الجلد يسير جاف ويحتاج ترطيب عميق فـ كان اختياري دي السنه زيت اللوز وزبدة الشيا
استخدم الزيت لكل الجسم وزبدة الشيا للركب و الاكواع واليد حبيتهم مره وترطيب منجد عميق لليوم الثاني يجلس
* زبدة الشيا الي نفس الصوره ريحتها خفيه مو زي الصفرا الخام
.
.
عطور بعد الشور الاول من باث اند بدي وركس hello يجنن ريحتو رايقه وسويت وتحسسك بالنظافه 💜
.
.
عطر من ابراهيم القرشي
اسمو مسك ابراهيم القرشي الخاص
دا منجد نظافه نظافه ريحتو مسك و بودره يجنن قليلة عليه
خلصت الكميه دي منو ودا وانا اعطر منو كل شويا 🙈 لو تقريباً شهرين عندي
الكميه فيها بركه ماشاءالله 💜
.
.
شمعتين من باث اند بادي بوركس
البني Mahogany Teakwood
ريحتها احبها معرف اوصف ريحتها بس تجنن اشتريتها كذا مره
الزرقاء Lavender Vanilla
ريتحها لافندر و فانيلا تجيب الروقان وتهدي الاعصاب برضو اشتريتها كذا مره
.
.
ماسك السكر الاسود
تكلمت عنو هنا
هوا مقشر وماسك فنفس الوقت
حيقشر الجلد الميت وينشط البشره
من اول استخدام حتلاحظي بشرتك ناعمه وفيها نضاره
.
.
اكياس البابونج من Twinings
جربت شركات كتير بس دي افضل وحده
فوائد البابونج كثيره ومنها مضاد للأكسده ومهدئ ويعالج الارق
احب اشربو كل يوم
.
.
هيلز بنك من نيو لوك
حب من اول نظره 😍 اول ماشفتو ماقدرت اقاومو
وهوا شاموا ودرجتو فالطبيعه مره احلى من الصوره
الين دحين مالبستو بس اخد لفه فيه فالبيت وارجع ههههههههه عشان مخليتو للعيد
هوا صح مو مريح بس لونو يغفرلو
قبل اسبوع رحت نيولوك ولقيتو موجود بس مقاسات كبيره
حسويلكم عليه تنسيقات للعيد ان شاءالله 💜💜
.
وبس كدا خلصت من مفضلاتي لشهر فبراير
.
دمتم بحب 💜
ليست هناك تعليقات:
إرسال تعليق