السلام عليكم ورحمة الله و بركاته
كيفكم ياحلوين وكيف رمضان معاكم ❤️
بوست اليوم حوريكم فيه عنايتي للعيد وهيا تقريباً عنايتي الي اسويها كل اسبوع عدا كم شغله اخليها شهرياً
حاولي دائماً تسويلك عنايه لشعرك وبشرتك وجسمك عشان وقت المناسبات مايروح عليكي الوقت وانتي تتجهزي
و يلا نبدأ
الشعر 💜
استخدم لشعري حنة لش مره بطلة في منه اربعه الوان بني و كستنائي و احمر و اسود
انا اكره الحنه لأنو يطبع في البلايز و المخدات و المنشفه وريحتو تصدعني + ينشف شعري
بس حنة لش غير ريحتو خفيفه و احلى من العاديه ومايطبع في البلايز و المخدات و المنشفه واجمل شي يعطي الشعر ترطيب و حيويه ويخرج من الشعر بسرعه وماتحتاجي بعدو تحطي بلسم وبنسبه للألوان مو مره تبان في الشعر
احطها قبل المناسبه بيومين او ثلاثه عشان تختفي الريحه تماماً من شعري
طريقة الاستخدام :
الحنة تجي صلبه عباره عن ٦ مربعات تقصيها حسب طول شعرك انا شعري لنص ظهري استخدم ٣ مربعات
و اذوبها في مويا حاره واحركها لين تذوب كلها واتركها تبرد واحطها على شعري من ٣ الى ٤ ساعات واغسلها عادي.
.
البشره 💜
اكتر شي تعتني فيه ويبان فيها النتيجه من اول او تاني مره البشره.
اول شي استخدم الماسك الاسود على كل وجهي او في مناطق الرؤوس السوداء .
بعد الماسك الاسود اسوي ماسك الطين المغربي اخلطو مع موية ورد وامدو على بشرتي
فوائد الطين المغربي للبشره
ينظف المسام ، يوحد لون البشره ، يعالج الحبوب ، ينعم البشره .
ونجي لتقشير البشره و الشفايف
انا استخدم ماسك الفراولة و السكر الاسود هوا ماسك ومقشر فنفس الوقت و بعد ما اغسلة على طول
استخدم ماسك الارز المرطب عشان يرطبلي بشرتي وما تكون جافه
تكلمت عنهم هنا
كلهم اخليهم على بشرتي من ١٠ الى ١٥ دقيقه .
قبل اغسل وجهي من ماسك الارز استخدم فرشاة لونا اسوي فيها مساج للبشره لمدة دقيقتين وبعدها اغسل وجهي.
واخر شي لاتنسي ترطبي بشرتك بكريم او جل او زيت خفيف
انا احب استخدم جل الصبار واهم شي يكون بارد مع قطرتين من زيت فيتامين E
الماسكات دي استخدمها فجر العيد او قبل الميك اب ترطب البشره .
.
الجسم💜
من الاشياء المهمه كمان تقشير الجسم من الجلد الميت
الحمام المغربي مره حلو للجسم انا اسوي في الشهر ٣ مرات
فوائده كثيره ومنها يفتح الجسم ، يشيل الجلد الميد ، يصغير المسامات
طريقتي فيه : اغسل جسمي بمويا دافيه واخذ منه شويا وامسحها على جسمي اخليه تقريباً ٥ دقايق وبعدها اغسل جسمي بمويا دافيه وابدأ اشيل الجلد الميت بنفس الليفه الي تجي معاه .
واذا ماعندك الصابون المغربي استخدمي اوشين سولت من لش
يعطي نظارة و حيوية تقدري تستخدمي للوجه كمان بس انا حبيته للجسم اكثر
رب رب رب الطف مقشر ريحتو تجنن و يعطي البشره نعومه
له طريقتين في الاستخدام الجسم جاف او رطب
او للشعر ينظف الفروه
اذا كنت ابغا تقشير عميق استخدمو جاف
واذا كنت ابغا تقشير خفيف استخدمو وجسمي فيه مويا
مقشر فرانك اشهر من نار على علم
كمان حلو بس ما استخدمه كثير عشان ريحتو قهوة بزياده
واخر شي واهم شي ترطيب الجسم نحافظ على نظارته بعد التقشير
.
وبس بكدا خلص بوست اليوم
وتذكري دائماً الي يناسبني ممكن مايناسبك والعكس صحيح
دائماً اعرفي الي يناسبك واستمري عليه مع تغير بسيط في المنتجات عشان الجسم اذا تعود على منتج ممكن يقل فعاليته .
دمتم بحب ❤️
ليست هناك تعليقات:
إرسال تعليق